༅༎ །བླ་མའི་རྣལ་འབྱོར་དངོས་གྲུབ་རྒྱ་མཚོ་ཞེས་བྱ་བ་བཞུགས་སོ།

ན་མོ་གུ་རུ་བྷྱཿ བརྒྱུད་གསུམ་བླ་མའི་བྱིན་རླབས་ཀུན། །དད་གུས་མོས་པའི་མཐུ་ཡིན་ཕྱིར། །མི་ཕྱེད་སྒོ་གསུམ་ཆིག་སྒྲིལ་གྱིས། །བླ་མའི་རྣལ་འབྱོར་འདི་ལ་འབད། །

ན་མོཿ རང་རིག་སྐུ་གསུམ་ངོ་བོ་ཉིད། །བླ་མར་ཤེས་པས་སྐྱབས་སུ་མཆི། །སྟོང་ཉིད་སྙིང་རྗེ་ཆེན་པོའི་ངང་། །འགྲོ་ཀུན་བསྒྲལ་བར་སེམས་བསྐྱེད་དོ། །ཨཱཿ མ་བཅོས་རིག་སྟོང་ཀུན་བཟང་ལས། །བསམ་བརྗོད་བྲལ་བའི་སྙིང་རྗེའི་ངང་། །ངེས་དོན་པདྨ་རྒྱལ་པོ་ཉིད། །ཏིང་འཛིན་རྣམ་གསུམ་ལྡན་པས་སྒོམ། །མདུན་མཁར་འཇའ་སྤྲིན་དྲ་བའི་དབུས། །རྒྱལ་བ་ཀུན་འདུས་བླ་མ་ཉིད། །ཨོ་རྒྱན་རྗེ་དང་དབྱེར་མེད་ངང་། །མོས་གུས་དད་པས་ལྷམ་མེར་གསལ། །ལྟ་སྒོམ་མོས་པས་མཇལ་ཕྱག་འཚལ། །སྣང་སྲིད་མཆོད་པའི་ཕྱག་རྒྱ་འབུལ། །སྡིག་ལྟུང་འདུས་མར་བྱས་པར་བཤགས། །ཚོགས་གཉིས་དགེ་ལ་རྗེས་ཡི་རངས། །ཐེག་གསུམ་ཆོས་འཁོར་བསྐོར་བར་བསྐུལ། །རྒྱལ་ཀུན་མྱ་ངན་མི་འདར་བཞུགས། །དགེ་ཚོགས་སྨིན་གྲོལ་ཐོབ་ཕྱིར་བསྔོ། །འགྲོ་ཀུན་སངས་རྒྱས་མྱུར་ཐོབ་ཤོག ། ཅེས་ཚིག་བདུན་གསོལ་འདེབས་དང་། ཨོཾ་ཨྰཿཧྰུྃ་བཛྲ་གུ་རུ་པདྨ་སིདྡྷི་ཧྰུྃ། ཅི་ནུས་བསགས། ཨོཾ་ཛྙྰ་ན་གུ་རུ་བཛྲ་སིདྡྷི་ཧཱུྂཿ ཞེས་ཅི་ནུས་དང་། གསོལ་འདེབས་ནི། ཨེ་མ་ཧོཿ ཡེ་ནས་མངོན་པར་བྱང་ཆུབ་པའི། །རྒྱལ་དབང་པདྨ་ཀ་ར་དང་། །གནུབས་ཆེན་སངས་རྒྱས་ཡེ་ཤེས་ལ། །གསོལ་བ་འདེབས་སོ་དངོས་གྲུབ་སྩོལ། །ལྷ་སྲས་རྒྱལ་བུའི་རྣམ་རོལ་པ། །པདྨ་དྲག་སྔགས་གླིང་པ་དང་། །རྣལ་འབྱོར་འོད་ཟེར་མཐའ་ཡས་ལ། །གསོལ་བ་འདེབས་སོ་དངོས་གྲུབ་སྩོལ། །དཀོན་མཆོག་ཀུན་འདུས་བླ་མ་ལ། །གསོལ་བ་སྙིང་གི་དཀྱིལ་ནས་འདེབས། །བྱིན་རླབས་མཆོག་ཐུན་དངོས་གྲུབ་སྩོལ། །གནས་ལུགས་རྟོགས་པར་ཐུགས་རྗེས་བཟུང་། ། བླ་མའི་གནས་གསུམ་འབྲུ་གསུམ་ལས། །འོད་ཟེར་རིམ་དང་ཅིག་ཆར་བྱུང་། །རང་གི་གནས་གསུམ་ཐིམ་པའི་མོད། །དབང་བཞི་ཐོབ་ཅིང་སྒྲིབ་བཞི་དག །ལམ་བཞིར་སྒོམ་པའི་སྣོད་གྱུར་ནས། །སྐུ་བཞིའི་དངོས་གྲུབ་ཐོབ་པར་གྱུར། །མཐར་ནི་བླ་མ་རང་ལ་ཐིམ། །དབྱེར་མེད་ངང་དུ་བྱིན་རླབས་ནས། །ཅིར་སྣང་བླ་མའི་རྣམ་རོལ་ཤར། །ཤར་གྲོལ་དམིགས་མེད་ངང་དུ་བཞག ། དགེ་བ་འདི་ཡིས་མྱུར་དུ་བདག །དཔལ་མགོན་བླ་མ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེའི་ས་ལ་འགོད་པར་ཤོག །ཅེས་མི་ཕྱེད་དད་པས་སྨོན་འདུན་དམ་བཅའ་གསོལ་བ་འདེབས་པ་དང་མཐུན་འགྱུར་གནང་བར་བསམ་པ་བྱའོ། །ཞེས་པ་འདིའང་སྐྱེན་པོ་དགོན་གྱི་དབུ་མཛད་འཇམ་དབྱངས་བློ་གྲོས་དང་རྟོགས་ལྡན་གངས་སྐྱབས་དང་མཁན་པོ་འོད་གསལ་མཐའ་ཡས་སོགས་སློབ་ཚོགས་ཀུན་གྱིས་དད་གུས་ཆེན་པོས་བསྐུལ་བས་བླ་མའི་ཐུགས་རྗེས་སྐྱོངས་བའི་སློབ་འབངས་ཐ་ཤལ་པ་ཤྲྰི་ཨ་ནནྟ་བཛྲས་རབ་རྒྱན་ལྕགས་ཡོས་ལྷ་བབས་དུས་ཆེན་ཉིན་མོས་གུས་དད་པའི་སྣང་བའམ་རིག་རྩལ་བདེ་བའི་འཆར་ཆ་བཞིན་དུ་ཝལ་ཡེལ་བོད་བརྒྱུད་ རྣལ་འབྱོར་ཆོས་ཚོགས་ཁང་གི་ཉེ་འགྲམ་ཀུན་བཟང་ཆོས་གླིང་གི་དབེན་ཁྲོད་ནས་བྲིས་པ་ཤྲྰི་སརྦ་བི་ཛ་ཡནྟུ། །དགེའོ། །