༧ ཆོས་རྗེ་མཁན་ཆེན་བླ་མ་མཆོག་གི་ཞབས་བརྟན་རིག་འཛིན་བྱང་ཆུབ་སེམས་དཔའི་བདེན་ཚིག་ཅེས་བྱ་བ།

ཨོཾ་སྭ་སྟི། ཀུན་བཟང་རྡོ་རྗེ་འཆང་དབང་རྡོ་རྗེ་ཆོས། །རྡོ་རྗེ་སེམས་དཔའ་དགའ་རབ་རྡོ་རྗེ་སོགས། །སྐུ་གསུམ་རིག་འཛིན་རྒྱ་མཚོའི་བྱིན་མཐུ་ཡིས། །ཆོས་རྗེ་བླ་མའི་ཞབས་པད་བརྟན་གྱུར་ཅིག།འཆི་མེད་རྡོ་རྗེའི་སྐུ་བརྙེས་པདྨ་འབྱུང་། །ཟ་ཧོར་ལྷ་ལྕམ་དབྱིངས་ཕྱུག་དཔལ་གྱི་ཡུམ། །ཚེ་ཡི་རིག་འཛིན་བརྙེས་པའི་བདེན་སྟོབས་ཀྱིས། །ཆོས་རྗེ་བླ་མའི་ཞབས་པད་བརྟན་གྱུར་ཅིག།འཇམ་དཔལ་སྐུ་དང་མ་ཆགས་པདྨའི་གསུང་། །ཡང་དག་ཐུགས་སོགས་སྒྲུབ་པ་བཀའ་བརྒྱད་ཀྱི། །བདུན་བརྒྱ་ཉེར་ལྔའི་ལྷ་ཡི་བྱིན་རླབས་ཀྱིས། །ཆོས་རྗེ་བླ་མའི་ཞབས་པད་བརྟན་གྱུར་ཅིག།མ་མགོན་གཟའ་དང་དམ་ཅན་རྡོ་རྗེ་ལེགས། །རྗེ་ཡི་མགུར་ལྷ་བོད་སྐྱོང་བརྟན་མའི་ཚོགས། །བརྒྱུད་གསུམ་དྲེགས་པའི་ཚོགས་ཀྱི་ཕྲིན་ལས་ཀྱིས། །ཆོས་རྗེ་བླ་མའི་ཞབས་པད་བརྟན་གྱུར་ཅིག།དཔལ་ཆེན་ཧེ་རུ་ཀ་ཡི་གནས་བཅུ་དང་། །གནས་ཡུལ་ཉེར་བཞི་དུར་ཁྲོད་ཆེ་བརྒྱད་ཀྱི། །ཞིང་སྐྱོང་མཁའ་འགྲོ་རྒྱ་མཚོའི་དམ་ཚིག་གིས། །ཆོས་རྗེ་བླ་མའི་ཞབས་པད་བརྟན་གྱུར་ཅིག། ཐོས་པ་མདོ་རྒྱུད་རྒྱ་མཚོའི་ཕ་མཐར་སོན། །བསམ་དང་སྒོམ་པས་གྲུབ་པའི་གོ་འཕང་བརྙེས། །ཐུབ་བསྟན་ཚུལ་བཞིན་བཟུང་བའི་དགེ་ལེགས་དེས། །ཆོས་རྗེ་བླ་མའི་ཞབས་པད་བརྟན་གྱུར་ཅིག།མགོན་མེད་འགྲོ་ལ་མགོན་གྱི་དམ་པར་བཞེངས། །བསྟན་པའི་དགྲ་བོ་བདེན་པའི་གསུང་གིས་མནན། །རེ་དོགས་མུན་པའི་དྲྭ་བ་བཅད་པ་ཡིས། །ཆོས་རྗེ་བླ་མའི་ཞབས་པད་བརྟན་གྱུར་ཅིག།ཁྱད་པར་ནུབ་ཕྱོགས་མུན་པའི་སྨག་རིམ་དུ། །ལུང་རྟོགས་ཆོས་ཀྱི་ཕྲིན་ལས་འབུམ་བརྡལ་བས། །སྐྱེ་དགུས་ལེགས་པར་བྱས་པའི་བསོད་ནམས་དེས། །ཆོས་རྗེ་བླ་མའི་ཞབས་པད་བརྟན་གྱུར་ཅིག།ཡི་དམ་ཡོངས་འདུས་དཔལ་དགྱེས་རྡོ་རྗེའི་སྐུ། །ཉེས་པའི་སྐྱོན་བྲལ་བདེན་ཚིག་རྡོ་རྗེའི་གསུང་། །རྨི་ལམ་དབང་ཕྱུག་འོད་གསལ་རྡོ་རྗེའི་ཐུགས། །སྐུ་ཚེ་བརྟན་ཅིང་ཕྲིན་ལས་རྒྱས་གྱུར་ཅིག།ཅེས་ཆོས་རྗེ་མཁན་ཆེན་བླ་མ་མཆོག་གི་ཞབས་བརྟན་རིག་འཛིན་བྱང་ཆུབ་སེམས་དཔའི་བདེན་ཚིག་ཅེས་བྱ་བ་འདི་ནི། དེང་སང་གི་དུས་ན་སྐྱེ་བོ་ཕལ་མོ་ཆེ་ཤེས་རབ་འཆལ་བས་སུ་ཞིག་མི་ཆེན་དང་བླ་ཆེན་དུ་གྲགས་ཤིང་འཁོར་དང་ལོངས་སྤྱོད་སོགས་འཛོམས་ན་དེ་ཉིད་སྐྱབས་ཀྱི་མཐར་ཐུག་ཏུ་བཟུང་བ་ཙམ་ལས་རང་ངོས་ནས་ལེགས་ཉེས་དཔྱོད་པའི་བློ་གྲོས་ནི་ཞན། བདེ་བར་གཤེགས་པའི་ཆོས་ལ་ཐོས་བསམ་སྒོམ་པ་ཚུལ་བཞིན་དུ་བྱས་ཤིང་གྲུབ་པའི་རྟགས་མཚན་ངོམ་པའི་སྐྱེས་བུ་ལོག་པར་ལྟ་བའི་ཡུལ་མིན་པ་རྣམས་ལ་ལོག་པར་བལྟས་ནས་རང་གི་རྣམ་ཤེས་ཀྱི་སྟེང་དུ་ས་སྤུངས་པའི་ཚུལ་མང་དུ་མཐོང་ན་ཡང་། ཁོ་བོ་རང་ནི་སངས་རྒྱས་དངོས་སུ་བྱོན་པའི་བླ་མ་དམ་པ་རྣམས་ཀྱི་སྐུ་དྲིན་དང་། རང་ངོས་ནས་ཀྱང་ཁྱི་རྒྱ་རྒྱ་རྒྱ་ཡུལ་དུ་སོང་ཡང་། རྒྱ་ཇ་ཁ་ལ་མ་རེག་པའི་དཔེ་ལྟར་མ་བྱས་པར་ལྟོ་སྐྱ་གོས་ཧྲིལ་གྱིས་ཐོས་བསམ་ཚུལ་བཞིན་དུ་བྱས་པའི་རང་དྲིན་རང་ལ་ཆེ་བ་བྱུང་བར་བརྟེན། སྐྱེས་བུ་དམ་པ་དང་དམ་པ་མ་ཡིན་པའི་ཚུལ་དཔྱོད་པ་ལ་གྲགས་པའི་རྗེས་སུ་འབྲང་མ་དགོས་ཙམ་གྱི་ཤེས་རབ་འདི་བྱུང་བ་ཡིན་པས། དུས་ཀྱི་མཐའ་འདིར་ཡང་ལུང་རྟོགས་ཀྱི་ཡོན་ཏན་རྒྱ་ཆེ་ཞིང་ཆོས་བརྒྱད་རེ་དོགས་ཀྱི་མདུད་པ་ལྷོད་པའི་སྐྱེས་ཆེན་དམ་པ་འདི་ལྟ་བུ་བྱུང་བ་ཤིན་ཏུ་དཀའ་བའི་ཚུལ་ལ་བསམས་ནས། མཁའ་འགྲོ་འདུ་བའི་དུས་ཚེས་བཟང་པོར་ཆོས་མིག་དག་པའི་སྐལ་ལྡན་མ་མཛེས་མ་སངས་རྒྱས་དཔལ་མོ་དང་། ཌཱཀྐི་རིན་ཆེན་སྒྲོལ་མ་སོགས་དང་མཉམ་དུ་ཚིག་བདུན་བླ་སྒྲུབ་ཀྱི་ཚོགས་མཆོད་གཟབ་རྒྱས་ཤིག་བྱས་པའི་སྐབས་སུ་ཡིད་ལ་གང་ཤར་སྙན་ངག་པ་དང་དག་སྣང་པའི་ལུགས་སྲོལ་གཉིས་འདྲེས་མར་བྱས་ཏེ་ངག་གི་བསོད་ནམས་ཀྱི་སྐལ་བཟང་ལྷུར་ལེན་པ་པོ་ནི། ཤཱཀྱའི་དགེ་བསྙེན་རྡོ་རྗེ་འཛིན་པ་མང་དུ་ཐོས་པའི་རྒྱལ་ཁམས་པ་སློབ་དཔོན་སྣ་ཚོགས་གཟུགས་ཅན་ཏེ། འདིས་ཀྱང་ཆོས་རྗེ་མཆོག་གི་ཞབས་པད་བསྐལ་བརྒྱར་བརྟན་ཅིང་ཕྲིན་ལས་ཕྱོགས་མཐར་རྒྱས་པའི་རྒྱུར་གྱུར་ཅིག། སརྦ་མངྒ་ལཾ། །། །