བླུན་དད་དང་ཚེ་སྲོག



འོད་ནག



ཀན་སུའུ་ཞིང་ཆེན་མི་དམངས་སྨན་ཁང་གཉིས་པར་ཡོད་པའི་ས་འགུལ་གནོད་ཐེབས་རྨས་མ་རིགས་འཛིན་མཚོ་ཟེར་བས་ང་ཚོ་ནད་གཡོག་ལ་སོང་བ་སྐོར་ཞིག་ལ་བཤད་དོན། ༼ དུས་ཚོད་ལྔ་ཙམ་གྱི་སྟེང་དུ་ས་འགུལ་བརྒྱབས་ནས་ཁང་བའི་དྲ་མ་སོགས་འགུལ་བས་ང་ཚོ་གཉིད་ལས་བསླངས་ཏེ་ཁང་བའི་སྒོ་རུ་བུད་པ་ཡིན།དེ་དུས་ཁྱིམ་མཚེས་རེ་འགའ་ཞིག་གིས་ད་དུང་ས་འགུལ་བརྒྱབས་པ་མ་ཚོར་བར་གཉིད་ནས་འདུག་པས་ང་ཚོས་ཁོ་ཚོ་ཡང་སྒོ་རུ་བོས་ཤིང་།ང་ཚོ་མྱི་མང་པོ་ཞིག་སྒོ་ཁ་ནས་ཡུན་རིང་ལ་བསྡད་པ་ཡིན་མོད།སྐབས་ཤིག་ནས་ང་ཚོས་བོད་ལ་ས་འགུལ་འབྱུང་མི་ཐུབ་རབས་བཤད་པ་དང་ཡང་བསྐྱར་ས་འགུལ་འབྱུང་རྒྱུ་མ་རེད་སོགས་འདོད་དེ་ཕྱིར་ཁྱིམ་དུ་སོང་ནས་གཉིད་པ་ཡིན་ལ།དེ་ནས་དུས་ཚོད་བདུན་ལྷག་གི་སྟེང་ནས་ཡང་བསྐྱར་ས་འགུལ་དྲག་པོ་བྱུང་ནས…… ༽ ཁོ་མོས་བཤད་ཐུབ་ཀི་མི་འདུག་ལ་བཤད་དགོས་ཀྱང་མི་འདུག་ཚང་མས་ཤེས་ཀི་ཨང་།

ཡིན་ཡང་གསལ་འདེབས་འགའ་དུས་ཐོག་འདིར་ཅིས་ཀྱང་བཤད་འདུན་སྐྱེས་བྱུང་བས་དགོངས་འགལ་མེད་པ་ཞུ།དེ་ཡང་ང་ཚོ་ཀུན་པོ་འཚོ་སྡོད་བྱེད་སའི་ས་སྒང་འདིར་ལོ་ངོ་རེ་འགའ་ཞིག་གི་སྔོན་ནས་བཟུང་།ས་ཡོམ་དང་ནད་ཡམ།ཆུ་ལོག་སོགས་མང་དུ་བྱུང་ནས་ཚེ་སྲོག་ཁྲི་སྟོང་མང་པོ་སྐད་ཅིག་ཉིད་ལ་རྨག་མེད་དུ་ཁྱེར་ནས་མྱིའི་རིགས་ཡོངས་ཚ་ཚ་འུར་འུར་དུ་བཟོས་ཡོད་ཀྱང་། ལྷ་ཡི་ཞབས་འོག་ན་བླུན་སྣང་གི་ང་རྒྱལ་ཞིག་གིས་བཟི་བའི་རང་རེ་བོད་པ་རྣམས་ཀྱིས། ང་ཚོ་བོད་ཡིན་པས་ནད་ཡམས་སོགས་ཀྱིས་གནོད་བྱེད་མི་ཐུབ་རབས་དང་། བླ་མ་དཀོན་མཆོག་གསུམ་དང་ཆོས་སྐྱོང་སྲུང་མ་སོགས་ཀྱིས་ནམ་ཡང་ང་ཚོ་སྐྱོབ་རབས་སོགས་བཤད་ནས་རང་གི་གཅེས་སུ་འོས་པའི་ཚེ་སྲོག་གི་བདེ་འཇགས་ལ་ཡང་ལུགས་དང་མཐུན་པའི་དོ་སྣང་དེ་ཙམ་བྱེད་མི་ཤེས་པར་འདུག་ལ། གལ་སྲིད་མྱི་ཞིག་གིས་དེ་འདྲ་ཞིག་མིན་ཚུལ་གྱི་གནས་ལུགས་ལྡན་པའི་སྐད་ཆ་རེ་བཤད་ན། མྱི་དེ་ལ་དད་པ་མེད་ཚུལ་དང་བོད་པ་ཞིག་གི་ཚད་གཞི་མེད་ཚུལ་སོགས་ཀྱི་ཉེས་དམོད་སྣ་ཚོགས་བྱས་ནས་མི་བུའི་སྨྲ་བརྗོད་རང་དབང་གི་སྐལ་ཡང་འཕྲོག་ལ་ཁད་བྱེད་མོད། ད་ནི་ས་ཡོམ་ཁྲོད་ཀྱི་ང་ཚོའི་ཕམ་ཁ་ཆེན་མོ་འདིར་བལྟས་པ་ཙམ་གྱིས་ཀྱང་བསམ་ཕྱོགས་དེ་དག་རྦད་དེ་ནོར་འདུག་པ་ཤེས་སླ་བའི་གནས་སུ་ཡོད་ཨང་། དེ་ཡང་དེ་འདྲའི་ལྷ་ནུས་མཐུ་ཅན་ཞིག་བོད་པ་དག་གི་མགོན་དུ་བཞུགས་ཡོད་ན་ད་རེས་ནི་གདོང་གྲོགས་བྱེད་པའི་དུས་སུ་བབས་ཡོད་ཀྱང་། རིགས་ཞེན་གྱི་བདེན་པ་སྙིང་ལ་བསྐོས་པའི་བོད་རིགས་སྤུན་ཟླ་རྣམས་དང་ལྷག་བསམ་གྱི་དཔལ་རྫོགས་པའི་མིའི་རིགས་ཀྱི་སྤུན་ཟླ་རྣམས་ལས། བོད་པ་དག་གི་དད་པའི་རྩེ་ན་བཞུགས་པའི་ལྷ་ཆེན་ནུས་མཐུ་ཅན་དེ་དག་གནོད་ཐེབས་ས་ཁུལ་གང་དུ་ཡང་ཐོན་མ་སོང་ལ་གནོད་སྐྱོབ་ཀྱི་ལས་ག་རེ་ཡང་བྱས་མ་ཐལ་ཨང་།

ང་ཡི་སྙིང་ཉེ་བའི་ཁ་བ་གངས་ཅན་པ་ལགས། ས་ཡོམ་དང་ནད་ཡམས། ཆུ་ལོག་སོགས་རང་བྱུང་ཁམས་ཀྱི་གནོད་འཚེ་གང་མང་ཞིག་ད་རེས་ཙམ་མ་ཡིན་པར་ད་དུང་མང་དུ་ཡོང་སྲིད་པས། དཀོན་མཆོག་གསུམ་ལ་དད་པའི་བོད་པ་དག་ལ་གནོད་བྱེད་མི་ཐུབ་འདོད་པའི་བླུན་སྣང་གི་ང་རྒྱལ་དང་ལྷ་ཡི་གདོང་གྲོགས་ལ་རེ་བའི་བག་ཆགས་དག་གཙང་སེལ་བྱས་ནས། རང་ཉིད་ཀྱི་མགོན་དུ་རང་ཉིད་བཞག་ནས་ནམ་ཡང་རང་གི་ཡོད་ཚད་ཡིན་པའི་ཚེ་སྲོག་རིན་པོ་ཆེ་ལ་གཅེས་སྐྱོང་གང་ལེགས་རེ་གནང་རོགས་ཞུ། དེ་ཡང་རིགས་འཛིན་མཚོ་དང་རིགས་འཛིན་མཚོ་དག་གི་བླུན་སྣང་གི་དད་པ་དང་ང་རྒྱལ་དེ་དག་མིན་རྒྱུ་ན། ཐེངས་འདིའི་དུས་ཚོད་ལྔ་ལྷག་སྟེང་གི་ས་ཡོམ་ཆུང་ངུ་དེས་ཉེན་བརྡ་ཞིག་བརྒྱབས་ཏེ་གནོད་ཐར་གྱི་གོ་སྐབས་རེ་སྤྲད་ཀྱང་འདུག་གི་རེད།



2010.4.23/ཉིན་དྲ་ཁང་ཞིག་ཏུ་འོད་ནག་ཏུ་འབོད་པས་སྦྱར་རོ། །