མ་ཎི་འཁོར་ལོ་ལས་བྱུང་བའི་བསམ་གཞིགས།

ཁྲོ་བོ་རྒྱལ་མཚན།

བྱིས་པའི་དུས་སུ། ང་ཚོའི་གྲོང་སྡེའི་དཀྱིལ་གྱི་འཁོར་ཁང་དུ་མནི་འཁོར་ལོ་ཆེན་པོ་ཞིག་ཡོད། རྒན་འཁོགས་རྣམས་ཀྱིས་དུས་རྒྱུན་དུ་རང་གི་ཚ་བོ་ཚ་མོ་རྣམས་ཁྲིད་ནས་མ་ཎི་འཁོར་ལོ་སྐོར་བ་དང་བྱིས་པ་སྐྱོང་བ་རེད། ང་ཚོ་བྱིས་པ་རྣམས་ཀྱི་སེམས་སུ་དད་པའི་འདུ་ཤེས་ཅི་ཡང་མེད་པས། མཚམས་མཚམས་སུ་རྒྱ་རའི་ནང་དུ་རྩེད་མོ་རྩེ་བ་དང༌། ལན་རེར་སྤོ་བོ་རྨོ་བོའི་རྗེས་སུ་འབྲངས་ནས་མ་ཎི་འཁོར་ལོ་སྐོར་རོགས་བྱས། མ་ཎི་འཁོར་ལོ་སྐོར་རོགསབྱེད་སྐབས། ཁོང་ཚོའི་བཞིན་ལ་འཛུམ་མདངས་མངོན་བཞིན་དུ་ང་ཚོར་“ དགེ་བ་ཡོད། དགེ་བ་ཡོད”ཅེས་འཆད་ཅིང༌། དུས་དེ་ནས་བཟུང་སྟེ་མ་ཎི་འཁོར་ལོ་བསྐོར་ན་དགེ་བ་ཡོད་ཅེས་པ་དེ་བདག་གི་སེམས་སུའང་འཁོར་མོད། འོན་ཀྱང་དགེ་བ་ཞེས་པ་དེ་ཅི་ཞིག་ཡིན་པ་དང༌། གང་ན་ཡོད་པ་ཤེས་ཀྱིན་མེད་ལ། བསམ་བློའང་བཏང་མ་མྱོང༌།

ཡིན་ནའང༌། མ་འགྱངས་པའི་སྔོན་དུ་བདག་སྐུ་འབུམ་བྱམས་པ་གླིང་དུ་མཇལ་སྐོར་ལ་སོང་བ་ན། སྣེ་ཤན་མ་ཞིག་གིས་ང་་ཚོ་མ་ཎི་འཁོར་ལོ་ཆེན་པོ་ཞིག་གི་མདུན་དུ་ཁྲིད་ནས་རྒྱ་སྐད་ཀྱིས་འགྲེལ་བཤད་འདི་ལྟར་བྱས་བྱུང༌། “མ་ཎི་འཁོར་ལོ་བསྐོར་ན་ནང་གི་ཆོས་ཀྱི་གཟུངས་བཏོན་པ་དང་ཁྱད་མེད། འདི་ནི་ཆེད་དུ་ཡི་གེ་མི་ཤེས་པའི་མི་དང་ཆོསའདོན་མི་ཤེས་པའི་མི་རྣམས་ཀྱིས་དགེ་བ་སྒྲུབ་བྱེད་དུ་བཟོས་པ་རེད”ཅེས་ཟེར། དེ་ནས་བཟུང་སྟེ་བདག་གིས་མ་ཎི་འཁོར་ལོ་ནི་ཡི་གེ་མི་ཤེས་པའི་མི་རྣམས་ལ་འབྲེལ་བ་ཡོད་པའང་ཤེས་སོང༌། གནས་ཚུལ་འདི་མ་ཤེས་ན་ཅི་ཡང་མི་བསམ་མོད། འོན་ཀྱང་གནས་ཚུལ་འདི་ཤེས་རྗེས། བསམ་བློ་བཏང་གིན་བཏང་གིན་ཡིད་ལ་སྐྱོ་བ་ཞིག་དབང་མེད་དུ་སྐྱེས་བྱུང༌།

ང་ཚོས་ཤེས་གསལ་ལྟར། རང་རེའི་ཁ་བ་ཅན་གྱི་ལྗོངས་སུ་ཆེས་དར་ཁྱབ་ཆེ་བ་ནི་ཆོས་ལུགས་དང༌། གང་སར་ཁྱབ་པའི་བཟོ་ལས་ལག་རྩ་ལ་གྱི་ཐོན་རྫས་ནི་མ་ཎི་འཁོར་ལོ་ཡིན། ས་གང་དུ་སོང་ན། མ་ཎི་འཁོར་ལོ་མེད་ས་ཞིག་མཐོང་དཀོན་པ་དང༌། དགོན་པ་ཞིག་ཡོད་ན། དེ་རུ་ཆེ་ཆུང་མི་འདྲ་བའི་མ་ཎི་འཁོར་ལོ་བགྲང་གིས་མི་ལང་བ་ཡོད་པར་མ་ཟད། ད་རུང་མི་རེ་རེས་མ་ཎི་ལག་སྐོར་རེ་བསྐོར་ནས་འགྲོ་བཞིན་ཡོད། ཆོས་ཀྱི་གཟུངས་སྔགས་རྣམས་ཤིང་དང་རྡོ་ལ་བརྐོས་ཤིང་ཤོག་བུའི་ངོས་སུ་དཔར་ཡོད་པ་དང༌། ཡང་ན་རས་སུ་དཔར་བ་རྣམས་དར་ཤིང་ལ་བཏགས་ཏེ་རླུང་གིས་ལྷབ་ལྷུབ་ཏུ་སྐྱོད་པ་དེ་དག་གིས་རང་གིས་ཆོས་འདོན་པའི་ཚབ་བྱས་པ་རེད། དེ་ལས་བོད་མི་མང་ཆེ་བས་ཆོས་དད་ཟབ་མོས་དགེ་བ་སྒྲུབ་འདོད་པ་དང་འཚང་རྒྱ་བར་འདོད་པའི་རེ་བ་ཤེས་ཐུབ་མོད། འོན་ཀྱང༌། ཡི་གེ་མི་འདོན་པ་དང་འདོན་མི་ཤེས་པ་ལ་དོ་སྣང་མི་བྱེད་པ་རེད། ཕྱོགས་གཅིག་ནས་ངན་སོང་གི་སྡུག་བསྔལ་ལ་སྐྲག་པས་ཆོས་ཀྱི་གཟུངས་མང་དུ་བསོག་འདོད་པ་དང༌། ཕྱོགས་གཞན་ཞིག་ནས་ཡིག་ཐོག་ནས་འདོན་མི་ཞེས་ཤིང་ཡིག་ངོ་མ་ཆོད་ཀྱང༌། མ་ཎི་རླུང་འཁོར་དང་ཆུ་འཁོར། དར་ལྕོག་སོགས་རང་བྱུང་གི་ཤུགས་ལ་བརྟེན་ནས་འདོན་དུ་བཅུག་སྟེ་དགེ་བ་བསྒྲུབ་ཆོག་སྙམ་པ་རེད།

དེར་བརྟེན། མ་ཎི་འཁོར་ལོ་བསྐོར་བ་ཙམ་གྱིས་འདོད་བློ་ཚིམས་ནས་རིག་གནས་སློབ་པ་ལ་གཙིགས་ཆེན་མི་བྱེད་ཅིང༌། གཞན་གྱི་རྗེས་སུ་ལུས་ཡོད་པའང་མ་ཤེས་པར་བློ་བདེ་བག་ཕེབས་སུ་བསྡད་ཡོད་པ་རེད། མ་ཎི་འཁོར་ལོ་ཇེ་མང་སོང་བ་དང་བསྟུན་ནས་ཡིག་རྨོངས་པ་ཡང་ཇེ་མང་དུ་འགྲོ་བ་དང༌། མ་ཎི་འཁོར་ལོ་ཇི་ལྟར་མགྱོགས་པར་འཁོར་ན་རང་རིགས་སྤྱི་ཚོགས་ཀྱི་ལོ་རྒྱུས་ཀྱི་འཁོར་ལོའང་དེ་ལྟར་ཇེ་དལ་དུ་འགྲོ་བ་དང༌། དར་ཤིང་ཇི་ལྟར་རིང་ན་རང་རིགས་ཀྱི་སྤྱི་ཚོགས་གོ་གནས་ཀྱང་དེ་ལྟར་ཇེ་དམའ་རུ་འགྲོ་བཞིན་འདུག

མ་ཎི་འཁོར་ལོ་སྐོར་བ་དང་དར་ལྕོག་བསྒྲེང་བས་ཆོས་འདོན་པའི་ཚབ་བྱས་པའི་སྤྱོད་ཚུལ་དེ་རིགས་ལ་ཚེ་ཕྱི་མར་ཕན་པ་ཡོད་མེད་མི་ཤེས་ཀྱང༌། ཚེ་འདིར་རང་རིགས་ཀྱི་རིག་གནས་སློབ་པ་དང༌། སློབ་གསོ་གོང་དུ་སྤེལ་བ་ལ་ཕན་པ་མེད་པ་ནི་གསལ་ལེར་མངོན། གལ་ཏེ་ཐབས་འདི་ཐོག་མར་འདོན་མཁན་དག་གིས་ཡི་གེ་འདོན་མ་ཤེས་པའམ་ཡིག་ངོ་མ་ཆོད་ན། ཆོས་ལ་དད་པ་བྱས་ནའང་ཕན་པ་མེད་ཅེས་དང་། ཡི་གེ་མ་ཤེས་ན། དུད་འགྲོའི་སྐྱེ་ལུས་ལེན་པར་འགྱུར་རོ་ཞེས་ནན་བཤད་བྱས་ཡོད་ཚེ། ད་ལྟ་ང་ཚོ་བོད་པ་ནི་འཛམ་གླིང་མི་རིགས་གྲས་ཀྱི་སྔོན་མ་ཞིག་ཡིན་མིན་མི་ཤེས་ནའང༌། འདི་འདྲའི་རྗེས་ལུས་ཤིག་ག་ལ་ཡིན་སྲིད་དེ། མི་སྲིད་དོ །

ད་ལྟ་འཛམ་གླིང་ན་ཆེས་དར་རྒྱས་ཆེ་བའི་རྒྱལ་ཁབ་ནི་ཨ་རི་ཡིན། ཨ་རི་ཆེས་དར་རྒྱས་ཆེ་བའི་རྒྱལ་ཁབ་ཅིག་ཏུ་འགྱུར་ཐུབ་པའི་རྒྱུ་མཚན་ནི་ཚན་རིག་ལག་རྩལ་ཧ་ཅང་དར་ཡོད་པའི་སྟབས་ཡིན་པ་དང༌། དེ་ཡང་རྩ་བ་ནས་བཤད་ན། སློབ་གསོ་དར་རྒྱས་ཆེ་བས་ཡིན་ནོ། ཡིན་ནའང༌། ཨ་རིའི་རྒྱལ་ཁབ་ནི་ལྷ་མེད་ཆོས་མེད་ཀྱི་རྒྱལ་ཁབ་ཅིག་མ་ཡིན་པར། ཡེ་ཤུའི་ཆོས་ལུགས་ལ་དད་པ་བྱེད་པའི་སྲོལ་ཧ་ཅང་དར་བའི་རྒྱལ་ཁབ་ཅིག་ཡིན་ཏེ། དཔེར་ན། འཇིག་རྟེན་འཕུར་སྐྱོད་པས་ཚན་རིག་ལག་རྩལ་ཐད་ནས་ཆེས་མཐོ་བའི་འཇིག་རྟེན་འཕུར་གྲུ་བསྐོར་ནས་རིམ་ཕྱིའི་ནམ་མཁར་འཕུར་དུས་སུ་ཧ་ལས་པའི་ངང་ནས“འཇིག་རྟེན་བདག་པོ་སྟོབས་ཤུགས་ཅི་འདྲ་ཆེ་ཨང༌། འདི་འདྲའི་འཇིག་རྟེན་ཆེན་པོ་བསྐྲུན་ཐུབ་བྱུང་ངོ”ཞེས་བཤད་པ་ལས་ཀྱང་ཤེས་ཐུབ།

ལོ་རྒྱུས་ཀྱི་ཐད་ནས་བལྟས་ན། ཨ་རིའི་ས་ཆ་ག་གེ་མོར་ཕྱོགས་ཡོང་པའིགྲོང་ཚོ་རེ་ཆགས་མ་ཐག་ཏུ་ཆོས་ཚོགས་ཀྱིས་ཀྱང་དེ་རུ་སློབ་གྲྭ་རེ་བཙུགས་པ་ཡིན་ལ། སྐབས་དེར་ཡེ་ཤུའི་ཆོས་ལུགས་པའི་ཆོས་པ་རྣམས་ཀྱིས《དམ་པའི་གསུང་རབ》དེ་ནི་འཇིག་རྟེན་བདག་པོའི་བཀའ་དང་དགོངས་པ་བཀོད་པའི་གཞུང་ཡིན་ཞིང༌།མི་རེ་རེས《དམ་པའི་གསུང་རབ》ཐད་ཀར་འདོན་ཐུབ་ཅིང་གོ་བ་ལེན་ཐུབ་པས་ན།

ད་གཟོད“རང་ཉིད་ཀྱི་རྣམ་ཤེས་ལ་ཐར་པ་འཐོབ་ཐུབ་པར་མ་ཟད། འཇིག་རྟེན་བདག་པོ་དང་ལྷན་དུ་གནས་ཐུབ”ཅེས་འཆད། དེས་ན། མི་རྣམས་ཀྱིས་《དམ་པའི་གསུང་རབ》ཐད་ཀར་འདོན་ཤེས་པའི་ཆེད་དུ་གང་ས་གང་དུ་སློབ་གྲྭ་བཙུགས་ཤིང་བྱིས་པ་རྣམས་སློབ་གྲྭར་བསྐྱལ་ནས་ཡི་གེ་སློབ་ཏུ་བཅུག་པ་དང༌། སློབ་གསོའི་ལས་དོན་ཁྱབ་གདལ་དུ་སྤེལ་བའི་མགོ་ཚུགས་པ་རེད། སྐབས་དེར་ཆོས་དད་དང་སློབ་གྲྭའི་སློབ་གསོའི་བར་ལ་འབྲེལ་བ་དམ་པོ་ཡོད་པར་མ་ཟད། ཆོས་དད་ཀྱི་དགོས་མཁོ་ཡིས་སློབ་གྲྭའི་སློབ་གསོ་སྤེལ་བར་ཤུགས་རྐྱེན་ཟབ་མོ་ཐེབས་ཡོད།

ཨ་རིའི་སྒེར་ཚུགས་ཀྱི་རྒྱལ་ཁབ་མ་བཙུགས་གོང་དུ། རླབས་ཆེ་བའི་བསམ་བློ་པ་དང་ཆབ་སྲིད་པ་རྣམས་ཀྱིས་ཤེས་བྱ་ནི་སྤྱི་མཐུན་རྒྱབ་ཁབ་ཀྱི་བླ་སྲོག་ཡིན་པར་འདོད་པ་དང༌། མ་འོངས་པའི་སྲིད་གཞུང་ནི་ཆེས་དམངས་གཙོ་དམངས་བདག་ཅན་དང༌། ཆེས་རང་དབང་ཅན་ཞིག་ཡིན་དགོས་པ་ལས། ཡིག་རྨོངས་པས་ཁྱབ་པའི་མངའ་ཁོངས་ཤིག་གཏན་ནས་ཡིན་མི་རུང་སྙམ་སྟེ། སློབ་གསོ་སྤེལ་བ་དང༌། ཡིག་རྨོངས་སེལ་བའི་ཕུགས་བསམ་དེ་མངོན་འགྱུར་བྱེད་པའི་ཆེད་དུ་ཆོས་ལུགས་དྲིལ་བསྒྲགས་གང་མང་བྱས་པ་རེད། དུས་དེ་ནས་བཟུང་སྟེ་ཨ་རིའི་རྒྱལ་ཁབ་ལ་སྔོན་བྱུང་མ་མྱོང་བའི་སློབ་གསོའི་ལོ་རྒྱུས་ཤིག་བྱུང་ཞིང༌། རྒྱལ་སྲིད་ཀྱི་ཁྲིམས་མ་སྤེལ་སྔོན་དུ་སློབ་གསོའི་ཁྲིམས་སྤེལ་བ་དང༌། དུས་དེ་ནས་བཟུང་སྟེ་ཨ་རིའི་རྒྱལ་ཁབ་ཀྱི་སྲིད་འཛིན་པས་སློབ་གསོ་རྩ་བར་འཛིན་པའི་སྲོལ་བཟང་བསྐྱངས་པ་དང༌། དུས་དེ་ནས་བཟུང་སྟེ་ལོ་རབས་ནས་ལོ་རབས་བར་དང། མི་རབས་ནས་མི་རབས་བར་དུ་རྒྱུན་མ་ཆད་པར་འབད་པ་བྱས་པས།སློབ་གསོ་དང་ཚན་རིག་ལག་རྩལ་ཆེས་སྔོན་ཐོན་ཅན་གྱི་ཚད་དུ་སླེབས་པར་གྱུར།

གནས་ཚུལ་དེ་ལ་བལྟས་ན། ཕྱོགས་གཅིག་རྣས་མི་རེ་རེས《དམ་པའི་གསུང་རབ》ཐད་ཀར་འདོན་ཤེས་ནས་ཐར་པ་འཐོབ་ཐུབ་པའི་ཆེད་དུ་སློབ་གསོ་སྤེལ་བ་དང༌། ཕྱོགས་གཞན་ཞིག་ནས་ཤེས་ཡོན་སྤེལ་རྒྱ་ཆེ་ཞིང་ཆུ་ཚད་མཐོ་བའི་རྒྱལ་དམངས་ཁྲོད་དུ་དམངས་གཙོ་དམངས་དབང་གི་སྲིད་ལུགས་གསར་པ་ཞིག་འཛུགས་ཐུབ་བྱུང༌། དེའི་ཕྱིར་ཨ་རིའི་སློབ་གསོའི་བྱ་བཞག་ཀྱང་ཡར་ཟླ་བཞིན་གོང་ནས་གོང་དུ་འཕེལ།

ང་ཚོས་བསམ་བློ་གཏོང་དགོས་པ་ནི། མི་རིགས་གཞན་པར་ཆོས་ལ་དད་པ་བྱེད་པའི་སྲོལ་ཡོད་མོད་ཀྱང༌། སློབ་གྲྭའི་སློབ་གསོ་ལ་གནོད་པ་མི་བྱེད་པར་མ་ཟད་སྐུལ་འདེད་ཀྱི་ནུས་པ་ཆེན་པོ་ཐོན་ཡོད། ང་ཚོ་དད་ལྡན་གྱི་བོད་མི་རིགས་ཀྱང་དེ་ལྟར་ཡིན་ན། བོད་ཀྱི་སློབ་གསོ་ཆེས་ཆེར་འཕེལ་ངེས་ཡིན་མོད། འོན་ཀྱང༌། ཡིད་སྐྱོ་བ་ཞིག་ནི་ཆོས་ལུགས་དད་མོས་ཆེ་བའི་བོད་མིས་ཡི་གེ་མ་ཤེས་ཀྱང་གཞན་གྱིས་ཆོས་འདོན་རོགས་ཞུ་བའམ། མ་ཎི་འཁོར་ལོ་བསྐོར་བའམ། ཆུ་དང་རླུང་དང་དར་བཅས་ཀྱིས་ཚབ་བྱེད་ཆོག་པའི་ལེ་ལོའི་སྤྱོད་ཚུལ་དེས་སློབ་གསོ་སྤེལ་བར་ཕན་ཐོགས་མེད་པར་མ་ཟད། ད་དུང་གནོད་པ་བྱས་ཡོད་སྙམ། །

༢༠༠༤ལོའི་སྦྲང་ཆར་དེབ་༤པ་ལས་བདམས།