འོད་ཟེར་ནག་པོ།

རོང་བོ་དགེ་འདུན་ལྷུན་གྲུབ།

༤.༡༤ དོན་རྐྱེན་ཁྲོད་ཀྱི་ངའི་ཕུ་ནུ་མིང་སྲིང་དག་ལ་ཕུལ་བ

ས་གཞི་རི་རབ་འགུལ་བའི་དངངས་སྐྲག་གིས། །

ཕ་མ་བུ་ཕྲུག་སོ་སོར་ཕྱེས་པའི་སྙིང་། །

དྲག་ཏུ་འཕྱོ་ཞིང་དྲག་དུ་སྐྱོམས་པའི་ཚེ། །

བླ་མ་སྤྱན་རས་གཟིགས་ཀྱིས་ཐུགས་རྗེས་སྐྱོངས། །

གྲང་དང་མནར་བའི་སྡུག་གིས་ཡོངས་འཚེ་ཞིང་། །

ལྟོགས་དང་བཀྲེས་པའི་མུ་གེ་བྱུང་བ་ན། །

གང་ལ་རེ་བའི་མིག་ཟུང་གཏོད་པའི་དུས། །

བླ་མ་སྤྱན་རས་གཟིགས་ཀྱིས་མགོན་སྐྱབས་མཛོད། །

གཅེས་ཤིང་ཕངས་པའི་ལང་ཚོ་བོར་བ་དང་། །

དྲོད་ཁོལ་འཛོམས་པའི་གཞིས་ཁྱིམ་གཏོར་བའི་ངང་། །

ཡིད་ཀྱི་གཏད་སོ་བྲལ་བའི་འཇིགས་སྐྲག་ཀུན། །

བླ་མ་སྤྱན་རས་གཟིགས་ཀྱིས་སེལ་བར་སྨོན། །

ཕ་ཡིས་བུ་སྟོར་བུ་ཡིས་ཕ་སྟོར་ཞིང་། །

བུ་མོས་མ་སྟོར་མ་ཡིས་བུ་སྟོར་ནས། །

སྐྱོ་བའི་འོ་དོད་རིང་མོས་ས་འགུལ་དུས། །

བླ་མ་སྤྱན་རས་གཟིགས་ཀྱིས་བརྩེ་བས་གཟིགས། །

ལས་ཀྱིས་བདས་ཤིང་རྐྱེན་གྱིས་ཉེར་བཟོས་པའི། །

མི་འདོད་དམྱལ་བའི་སྡུག་བསྔལ་མངོན་སུམ་དུ། །

ཨར་འདམ་གསེབ་དང་ཟོམ་ན་མྱོང་བའི་དུས། །

གྲུ་འཛིན་མགོན་དེས་ཐུགས་སྐྱེད་བདག་གིར་བཞེས། །

ཀྱེ་ཧུད་མགོན་དང་དཔུང་གཉེན་བྲལ་བ་ཡི། །

ཉམ་ཐག་འགྲོ་ཀུན་འདི་ཀོ་ཡལ་བོར་ནས། །

བདེ་དང་སྐྱིད་པའི་ངང་དུ་འཚོ་འདོད་དག །

བསྟན་དང་སྟོན་པར་དཀར་བའི་གཏམ་དེ་རྫུན། །

རིགས་ཀྱི་ཆེ་བས་གཅིག་ཏུ་ཉེར་བཅིངས་ཤིང་། །

བྱམས་དང་བརྩེ་བའི་དམ་ཚིག་གཙང་བ་ཀུན། །

གཏོང་དང་ཡངས་པའི་སྒོ་གླེགས་འབྱེད་པ་ལ། །

ལྷག་བསམ་སེམས་བསྐྱེད་དྲག་པོས་མཐུན་འགྱུར་མཛོད། །

དེ་ལྟའི་ཡིད་ལ་གདུང་བའི་ཁུར་ལྕི་ཡང་། །

བསོད་ནམས་ཚོགས་གཉིས་གསར་དུ་གསོག་པའི་ཐབས། །

ལག་ཏུ་བསྟར་བའི་མངོན་འདོད་སྒྲུབ་སླད་དུ། །

གང་ལ་འཚམ་པའི་དན་རྟགས་མ་ནོར་ཞིག །

ཁོག་གི་སྙིང་དང་དཔྲལ་བའི་མིག་བཞིན་དུ། །

འབྲལ་བར་མི་ཕོད་ང་ཡི་ལྕམ་སྲིང་ཀུན། །

དེ་རིང་གློ་བུར་གསོན་བྲལ་བྱས་པ་འདིར། །

མཆི་མ་མི་འདོན་སེམས་དེ་རྡོ་ལས་བྱས། །

གཟུགས་ཅན་མི་དང་གཟུགས་མེད་ལྷ་ཡི་དཔུང་། །

དངོས་ཤུགས་བརྒྱུད་གསུམ་རེག་དང་འཕྲད་པ་ལས། །

མཐུ་དང་ནུས་པའི་བདེན་སྟོབས་མ་ལྷོད་པར། །

སྐྱོབ་དང་སྐྱབས་ཀྱི་འཕྲིན་ལས་དང་དུ་ལོངས། །