རྗེས་དྲན་པད་དཀར་འདབ་བརྒྱད།

སྐུ་ནི་ནུབ་ཕྱོགས་ཨ་རིར་འཁྲུངས། །ཐུགས་རྒྱུད་ཤར་ཕྱོགས་བོད་དང་འདྲེས། ། རྒྱ་བལ་འབྲུག་སོགས་ཀུན་ལ་བཅགས། ། གསུང་རབ་གཅེས་སྐྱོབས་མཛད་དེར་འདུད། །

ཁྱེད་ནི་མ་ཧཱ་པཎྜི་ཏ། །འཇམ་དབྱངས་རྣམ་རྒྱལ་ཞེས་སུ་གྲགས། །ངེས་པ་དོན་ལྡན་རིན་པོ་ཆེར། །ཆེན་པོའི་ལུང་གིས་ཡོངས་སུ་བསྔགས། །

ཁྱེད་ནི་ལོ་ཀཱ་ཙཀྵུ་ཏེ། །སཾ་བོད་ཧོར་སོགས་བརྡ་ལ་བྱང་། ། སྐད་མང་ཤན་སྦྱར་དྲ་རྒྱ་ཡི། ། དཔེ་མཛོད་འཕྲུལ་གྱི་མེ་ལོང་སྐྲུན། །

ཁྱེད་ནི་གྲུབ་པའི་སྐྱེས་བུ་སྟེ། །མི་བརྗེད་གཟུངས་སྤོབས་དང་ལྡན་ཞིང་། །ཁེངས་སྐྱུངས་བྱམས་ཤིང་ཕྱོགས་རིས་བྲལ། །རང་དོན་ཀུན་སྤངས་ཚེ་མཐར་ཕྱིན། །ཁྱེད་ནི་བཀའ་སྲུང་གཏེར་བདག་སྟེ། །ཇི་སྲིད་ནམ་མཁའ་གནས་ཀྱི་བར། །དེ་སྲིད་གློག་རྡུལ་གཏེར་སྒྲོམ་ནང་། །གསུང་རབ་རྒྱ་མཚོ་གཏེར་དུ་བཅུག།

ཁྱེད་ནི་སྤྲུལ་པའི་གཏེར་སྟོན་ཏེ། །ཡུལ་དུས་རིགས་ཀྱིས་མ་བཅད་ཅིང་། །ལོངས་སྤྱོད་ཐོབ་ལ་མི་ལྟོས་པར། །ལས་ཅན་ཀུན་ལ་དཔེ་གཏེར་འགྱེད། །ཨེ་མའོ་མཁས་ཤིང་ཨེ་མའོ་གྲུབ། །ཨེ་མའོ་སྲུངས་ཤིང་ཨེ་མའོ་སྟེར། །བདག་སོགས་ཡིད་རངས་བསྟོད་བགྱིས་ན། །དགེ་བས་རྒྱལ་བསྟན་དར་རྒྱས་ཤོག།

ཁྱད་པར་དཔེ་ཚོགས་ལྟེ་གནས་འདིར། །མཐུན་རྐྱེན་ལྷུན་གྱིས་གྲུབ་པ་དང་། །ལས་བྱེད་ལྷག་བསམ་དག་པ་ཡིས། །མཛད་འཕྲིན་འདི་ཀུན་མཐར་ཕྱིན་ཤོག།

ཅེས་པའང་ཁྱེད་སྐུ་(བོད་རིག་པའི་མཁས་དབང་སྐུ་ཞབས་ཇེ་སི་མའེ་སི་)ཞི་བར་གཤེགས་ནས་དགུང་ཞག་ཞེ་དགུར་ཕེབས་པའི་དུས་ཚིགས་ཁྱད་པར་བ་འདི་ལ། དམ་པ་ཁྱེད་ཀྱི་འཁོར་གྱི་གྲལ་མཐར་འཁོད་པ་རྒྱལ་རྩེ་ནང་པ་ཆུང་བདག་ནས། ལྷག་བསམ་དག་པའི་རྗེས་དྲན་མཚོན་བྱེད་དུ་པད་དཀར་འདབ་བརྒྱད་ཀྱི་ཚིགས་སུ་བཅད་པ་འདི་བཞིན་ཕུལ་བ་དགེ